ជាមួយនឹងគេហដ្ឋានខាមប៊ូចាយ៉ា យើងមានគោលបំណងបង្កើតទីធ្លារស់នៅដែលមានលក្ខណៈបត់បែន និងសមស្របទៅនឹងបរិបទនៃបរិស្ថាននិងអាកាសធាតុជុំវិញ ក៏ដូចជាវប្បធម៌ក្នុងសហគមន៍។ ដំណើរការរចនាចាប់ផ្ដើមជាមួយនឹងគោលគំនិតច្បាស់លាស់មួយ បន្ទាប់មកធ្វើការបែងចែកជាចំណុចលម្អិតនិងសំខាន់ៗជាបន្ដបន្ទាប់។ លទ្ធផលដែលយើងទទួលបាន គឺជាការរួមបញ្ចូលរវាងជម្រើសនៃការរចនាដ៏ឆ្លាតវៃ និងកត្ដាដែលមានលក្ខណៈពិសេសមួយចំនួនទៀត ដើម្បីធានានូវប្រសិទ្ធិភាពដែលសម្របតាមរចនាបថបែបទំនើប និងប្រណីតនៃគេហដ្ឋានរបស់យើង។
ដោយទទួលបានឥទ្ធិពលពីធម្មជាតិបៃតងនៅជុំវិញ យើងមានបំណងបង្កើត និងណែនាំជីវភាពរស់នៅថ្មីមួយបែប ដែលផ្សាភ្ជាប់ទៅនឹងធម្មជាតិ អាកាសធាតុក្នុងតំបន់ និងសោភ័ណភាពដែលមានភាពទាក់ទាញដល់ប្រជាជនកម្ពុជា។
យើងដឹងថារចនាបថបែបនេះ មានលក្ខណៈខុសប្លែកពីផ្ទះល្វែងធម្មតា។ មិនតែប៉ុណ្ណោះក៏មានទីធ្លាដែលមានភាពស្រស់ស្អាត និងអាចធ្វើសកម្មភាពជាច្រើន ដែលផ្ដល់ផាសុកភាពនិងបង្កើនគុណភាពនៃជីវភាពរស់នៅ។
គោលគំនិតសំខាន់នៃគេហដ្ឋានខាមប៊ូចាយ៉ា គឺបានមកពីផ្ទះល្វែងខ្មែរបុរាណ។ គេហដ្ឋានរបស់យើងមានការបណ្ដុះគំនិតពីទីធ្លាដែលមានភាពច្នៃប្រតិដ្ឋ និងមានមុខងារសម្រាប់ធ្វើសកម្មភាពជាច្រើន ដោយយើងបានយកទម្រង់ផ្ទះល្វែងបុរាណមកអនុវត្តឡើងវិញ ហើយធ្វើការកែច្នៃដោយរួមបញ្ជូលរចនាបថបែបទំនើប។
ទីធ្លានៃគេហដ្ឋាននីមួយៗ ផ្ដល់ជីវភាពរស់នៅបែបរស់រវើក។ សកម្មភាពពីកន្លែងមួយទៅកន្លែងមួយមានភាពសាមញ្ញ បត់បែន និងដែលស្ថិតនៅជុំវិញសួនខាងក្នុង។ មិនតែប៉ុណ្ណោះបន្ទប់ទាំងអស់ក្នុងគេហដ្ឋានខាមប៊ូចាយ៉ា មិនថាជាទីតាំងប្រើប្រាស់រួមឬឯកជន សុទ្ធសឹងតែមានការរួមបញ្ចូលធម្មជាតិបៃតង។
ផ្ទះល្វែង និងវីឡាកូនកាត់ ផ្ដល់បទពិសោធន៍ខុសគ្នាសម្រាប់ការរស់នៅ ការប្រកបការងារ និងការធ្វើអាជីវកម្មក្នុងទីតាំងតែមួយ។ គេហដ្ឋានខាមប៊ូចាយ៉ា មានភាពងាយស្រួលសម្រាប់កែច្នៃទៅជា ហាងកាហ្វេ ការរិយាល័យ ស្ទូឌីយោ និងហាងលក់ទំនិញ ព្រមទាំងមានរួមបញ្ចូលធម្មជាតិបៃតង ពន្លឺធម្មជាតិ និងចរន្តខ្យល់ចេញចូលគ្រប់គ្រាន់។
ដោយមានការពិចារណាលើប្លង់បាត និងកម្ពស់នៃអគារ យើងបានណែនាំការរចនាដែលមានសួនក្នុងផ្ទះ។ ដំបូលកញ្ចក់ដ៏ធំនៃគេហដ្ឋានរបស់យើង មាននាទីជាប្រភពពន្លឺដែលអនុញ្ញាតឲ្យព្រះអាទិត្យឆ្លងកាត់បានពេញមួយថ្ងៃ និងផ្ដល់ពន្លឺគ្រប់គ្រាន់ក្នុងគេហដ្ឋាន។ លើសពីនេះទៅទៀត លំហក្រោមដំបូលក៏បង្កើតជាផ្លូវសម្រាប់លំហូរខ្យល់ក្នុង និងជុំវិញគេហដ្ឋានដែលអាចកាត់បន្ថយការប្រើប្រាស់ម៉ាស៊ីនត្រជាក់ផងដែរ។
សម្រាប់គេហដ្ឋានខាមប៊ូចាយ៉ា យើងមានបំណងរួមបញ្ចូលធម្មជាតិបៃតងតាមរយៈគេហដ្ឋានរបស់យើងដោយផ្ទាល់ ដើម្បីផ្ដល់បរិស្ថានរស់នៅមានធម្មជាតិបៃតង ដែលនឹងផ្ដល់ជីវភាពរស់នៅប្លែកពិសេសសម្រាប់អតិថិជនរបស់យើង។
ដើម្បីធានាពីអត្ថប្រយោជន៍នៃការរួមបញ្ចូលធម្មជាតិក្នុងជីវភាពរស់នៅ ដំណើរការនៃការរៀបចំសួនធម្មជាតិ ចាប់តាំងពីការជ្រើសរើសប្រភេទរុក្ខជាតិ ទីតាំងសម្រាប់ដាំរុក្ខជាតិនីមួយៗក៏ដូចជាប្រព័ន្ធស្រោចស្រព ត្រូវបានយកមកដោះស្រាយ។
នៅពេលដែលអគារត្រូវបានរចនាដោយមិនមានការគិតគូរពីការទប់ទល់នឹងកម្ដៅ បរិយាកាសនៅក្នុងផ្ទះនឹងមិនផ្ដល់ផាសុកភាពដល់ការរស់នៅឡើយ។ នេះពាក់ព័ន្ធទៅនឹងការប្រើប្រាស់ និងសមត្ថភាពនៃការចម្លងកម្ដៅនៃប្រភេទសម្ភារៈសំណង់នីមួយៗ។
ឧទាហរណ៍ ដុំឥដ្ឋក្រហមដែលមានការពេញនិយមប្រើប្រាស់ក្នុងវិស័យសំណង់នៅប្រទេសកម្ពុជា អាចស្រូបកម្ដៅខ្លាំងដោយសារម៉ូលីគីលដែលមានក្នុងប្រភេទឥដ្ឋនេះ។ ដូច្នេះជញ្ជាំងនៃអគារនីមួយៗនឹងស្រូបហើយរក្សាកម្ដៅពីមជ្ឈដ្ឋានខាងក្រៅមកក្នុងអគារ។ ដោយឡែកនៅពេលយប់ សីតុណ្ហភាពនៅមជ្ឍដ្ឋានខាងក្រៅនឹងត្រូវធា្លក់ចុះ ហើយកម្ដៅដែលបានស្រូបចូលក្នុងជញ្ជាំងនោះនឹងត្រូវបញ្ចេញទៅមជ្ឈដ្ឋានដែលមានសីតុណ្ហភាពត្រជាក់ ជាពិសេសទៅកាន់ទីធ្លារស់នៅ។ នេះជាមូលហេតុដែលធ្វើឲ្យសីតុណ្ហភាពក្នុងគេហដ្ឋានមានកម្ដៅក្ដៅជាងមជ្ឈដ្ឋានខាងក្រៅ។
ការសិក្សាស្រាវជ្រាវនេះបានធ្វើឲ្យក្រុមការងារខាមប៊ូចាយ៉ាជ្រើសប្រើវិធីសាស្ដ្រជញ្ជាំងឥដ្ឋពីរជាន់សម្រាប់គេហដ្ឋានរបស់យើង ដែលយើងបានរៀបជញ្ជាំងឥដ្ឋសងខាង និងមានចន្លោះនៅកណ្ដាល។ វិធីសាស្រ្ដនេះជួយដោះស្រាយបញ្ហានៃលំហូរខ្យល់ក្ដៅក្នុងអគារ ព្រមទាំងកាត់បន្ថយកម្ដៅក្នុងមជ្ឈដ្ឋានខាងក្នុង។ មិនតែប៉ុណ្ណោះវិធីសាស្ដ្រជញ្ជាំងឥដ្ឋពីរជាន់ ក៏បង្កើតជាបរិស្ថានរស់នៅដែលមានផាសុកភាព និងជួយកាត់បន្ថយការប្រើប្រាស់គ្រឿងបរិក្ខារដូចជា ម៉ាស៊ីនត្រជាក់ និងកង្ហារជាដើម។
វិសាលភាពនៃដំបូលកញ្ចក់បានផ្ដល់ពន្លឺធម្មជាតិគ្រប់គ្រាន់ ប៉ុន្ដែក៏អាចបង្កើនកម្ដៅផងដែរ។ ជាដំណោះស្រាយ ស្ថាបត្យករបានប្រើវិធីសាស្ដ្ររចនាច្នៃប្រតិដ្ឋមួយ ដែលធ្វើឲ្យមានលំហូរខ្យល់ឆ្លងកាត់តាមដំបូលកញ្ចក់។ រន្ធខ្យល់មានបិទសំណាញ់ដែលមាននៅចន្លោះដំបូលកញ្ចក់និងដំបូលក្បឿង នាំឲ្យមានចរន្ដខ្យល់ចេញចូលគ្រប់គ្រាន់ និងមិនបង្កឲ្យសត្វល្អិតហើរចូលក្នុងផ្ទះ។ លំហូរខ្យល់ធម្មជាតិដែលបានរៀបរាប់ខាងលើនេះ ផ្ដល់អត្ថប្រយោជន៍ដល់អ្នករស់នៅក្នុងគេហដ្ឋានរបស់យើងក្នុងការចំណាយលើអគ្គិសនី ដោយមិនចាំបាច់ពឹងផ្អែកលើសម្ភារៈអេឡិចត្រូនិចទាំងស្រុងនោះឡើយ។
សួនខាងក្នុងមានការរចនាផ្ទៃជញ្ជាំងគ្រឺមប្លែកពិសេស ដែលមានកម្ពស់ប្រហែល១៤ម៉ែត្រ លាតសន្ធឹងពីជាន់ផ្ទាល់ដីដល់ដំបូលកញ្ចក់។ ផ្ទៃជញ្ជាំងនេះមានការរចនាឡើយដោយដៃ ហើយបន្ថែមនូវភាពទាក់ទាញដល់រុក្ខជាតិបៃតងដែលនឹងរីកលូតលាស់ក្នុងសួន។
ក្នុងគេហដ្ឋាននីមួយៗ យើងបានប្រើវិធីសាស្ដ្ររចនាការ៉ូជើងជញ្ជាំងហៅថា “shadow gap” ជាការរចនាដែលមានផ្ទៃផតចូលក្នុងរវាងផ្ទៃជញ្ជាំងចុះទៅការ៉ូបាត។ គម្លាតនីមួយៗមានប្រវែង ១២មម ដែលកាត់ឆ្លាស់គ្នា បង្កើតជាការរចនាលក្ខណៈប្លែកពិសេសមួយបែបទៀត និងជួយបន្ថែមជម្រាលលើផ្ទៃជញ្ជាំងសរាបស្មើ។
ផ្ទៃជញ្ជាំងបន្ទប់ទឹកទាំងមូលនៅជាន់ខាងលើមានរៀបការ៉ូសេរ៉ាមិចពណ៌ស ដែលត្រូវបានតម្រៀបយ៉ាងផ្ចិតផ្ចង់។ វិធីសាស្ដ្រនេះ ជួយរក្សានូវសោភ័ណភាព និងរចនាបថនៃផ្ទៃជញ្ជាំងផ្នត់កោង។
ខាមប៊ូចាយ៉ាបានជ្រើសរើសពណ៌ដែលសក្ដិសមសម្រាប់ការតុបតែងផ្នែកខាងក្នុងគេហដ្ឋាន ដោយយើងបានធ្វើការវិភាគទៅលើទំនាក់ទំនងនៃតុល្យភាព ក៏ដូចជាភាពខុសគ្នារវាងប្រភេទថ្ម និងឈើដែលបានប្រើប្រាស់ក្នុងគេហដ្ឋាននីមួយៗ។ ការសិក្សាពីជម្រើសពណ៌នេះក៏ជួយបន្ថែមនូវសោភ័ណភាព និងភាពកក់ក្ដៅដល់ទីធ្លារស់នៅផងដែរ។
