០០២ សំណង់

បេតុងអាចទប់ទម្ងន់បានយ៉ាងល្អជាមួយនឹងកំលាំងសង្កត់បង្កឡើងដោយទម្ងន់របស់មនុស្ស គ្រឿងសង្ហារឹម និងសម្ភារៈប្រើប្រាស់ផ្សេងៗដែលមាននៅលើអគារ នេះហៅថា “បន្ទុកអថេរ” ព្រោះជាបន្ទុកមានបម្រែបម្រួលតាមការចល័តរបស់វត្ថុ។ ប៉ុន្តែគុណវិបត្តិដ៏ធំវិញគឺ បេតុងងាយនឹងបែកប្រេះពេលប៉ះនឹងកំលាំងទាញ ឬអាចនិយាយបែបម្យ៉ាងទៀតថា នៅពេលដែលបន្ទុកអថេរ ទទួលនូវកំលាំងពត់ និងកំលាំងសង្កត់បេតុង។ ដោយសារតែបេតុងខ្វះភាពយឺត ដូច្នេះកំលាំងទាញ និងពត់សង្កត់ក្នុងរយៈពេលយូរ អាចបណ្ដាលឲ្យបែកប្រេះ ឬអាចឈានដល់ការបាក់ស្រុត។ ហេតុដូចនេះ ទើបដែកថ្នាំងអំពៅ ជាលោហៈធាតុត្រូវបានយកមកបង្កប់ក្នុងបេតុង (ដែលយើងហៅថាបេតុងអាម៉េ) មកបំពេញនូវកង្វះភាពយឺតនេះ ក៏ដូចជាជួយរំលែកនូវកំលាំងទាញផងដែរ។

ដែកថ្នាំងអំពៅត្រូវបានបែងចែកចំណាត់ថ្នាក់ យោងតាមកម្រិតភាពធន់ និងយឺត រួមជាមួយសមាសធាតុគីមីនៃដែកថែបដែលយកទៅផលិត។ ស្តង់ដារដែកក្នុងឧស្សាហកម្ម មានការកំណត់ផ្សេងៗគ្នាទៅតាមប្រទេសនានា (ឧទាហរណ៍៖ JIS-ជុប៉ុន ASIC/ACI-អាមេរិច ។ល។)។ សម្រាប់ប្រទេសកម្ពុជា ដែកថ្នាំងអំពៅ ត្រូវបានផលិតជាទូទៅគោរពតាមស្តង់ដារ JIS របស់ជប៉ុន។ ស្តង់ដារនេះ ជួយឲ្យវិស្វករ មានភាពងាយស្រួលក្នុងការចាត់ចំណាត់ថ្នាក់ប្រភេទដែកទៅប្រើប្រាស់តាមកាលៈទេសៈ អាស្រ័យភាពយឺតរបស់ដែក ថាតើដែកនេះអាចទ្រកំលាំងទាញបានប៉ុណ្ណា រហូតដល់ពេលបាត់បង់ទម្រង់ដើម។

ក្នុងចំណោមនោះ ចំណាត់ថ្នាក់ដែលទាបបំផុតគឺ ដែកខ្នាត SD295 (Steel Deformed 295 N/mm2) ដែលគេប្រើប្រាស់សម្រាប់ការងារបេតុងដែលពុំសូវមានភាពដាបខ្លាំងពេក ដូចជា ផ្លូវថ្នល់ ឬកំរាលខ័ណ្ឌជាន់ផ្ទាល់ដីជាដើម ដើម្បីជួយកាត់បន្ថយការចំនាយ។ ចំណែកឯដែកខ្នាត SD390 វិញ ត្រូវបានគេសម្គាល់ជាទូទៅថា ជាខ្នាតស្តង់ដាសម្រាប់ការងារសំណង់ជាច្រើនប្រភេទក្នុងប្រទេសកម្ពុជា។  

ដីខ្សាច់ ជាប្រភេទដីដែលមានទំហំភាគល្អិតធំជាងគេ ក្នុងចំណោមដីទាំង ៤ប្រភេទ។ នៅពេលលាយដីខ្សាច់ ទឹក និងសមាសធាតុផ្សេងៗទៀតបញ្ចូលគ្នា ដីខ្សាច់ជួយបង្ហូរសមាសធាតុទាំងអស់ ផ្ដល់ភាពងាយស្រួលឱ្យល្បាយដែលលាយនោះខាំជាប់គ្នាសព្វល្អ។ ជាហេតុនាំឱ្យគេចាត់ទុកដីខ្សាច់ ជាសមាសធាតុបំពេញដ៏ល្អមួយ នៃល្បាយលាយជាមួយ បេតុង ម្នាងសិលា និងបាយអ។

ដីខ្សាច់ ក៏មានប្រើប្រាស់ជាការងារចាក់បំពេញផងដែរ ដែលក្នុងការងារបែបនេះ គេតែងជៀសវាងដីប្រភេទណាដែលផ្ទុកទឹកបានយូរ និងកាត់បន្ថយកុំឱ្យមានទឹកដក់ ដែលអាចប៉ះពាល់ដល់គ្រឹះសំណង់ទាំងមូល។

ដីឡូម៉ា ជាដីផ្ទុកនូវល្បាយសារធាតុដីខ្សាច់ ដីឥដ្ឋ និងដីល្បាប់ មានកម្រិតផ្ទុកទឹកខ្ពស់ជាងដីខ្សាច់បន្តិច។ ជានិច្ចកាល ក្នុងការងារចាក់បំពេញ គេអាចប្រើដីឡូម៉ា (ប្រភេទដីដែលមានភាគរយដីខ្សាច់ខ្ពស់) ជំនួសដីខ្សាច់ ព្រោះដីប្រភេទនេះមានតម្លៃធូរជាង។ ពេលខ្លះទៀត ដីឡូម៉ានេះក៏អាចប្រើលាយចាក់បំពេញជាមួយថ្ម ដើម្បីជួយពង្រឹងគ្រឹះខាងក្រោមឱ្យនឹងល្អ។

ចំពោះដីដែលមានភាគល្អិតតូចៗវិញ មានដីល្បាប់ និងដីឥដ្ឋ ក៏មានប្រើក្នុងវិស័យសំណង់ដែរ។ ដូចយើងបានសិក្សាមកពី ភាគមុន ដីដែលសំបូរសារធាតុដីឥដ្ឋ ត្រូវបានគេយកទៅផលិតជាដុំឥដ្ឋ ប្រើសម្រាប់ការងារជញ្ចាំង ការងាររៀបការ៉ូឥដ្ឋ និងការងារប្រកក្បឿង (ពេញនិយមនៅប្រទេសកម្ពុជា និងតំបន់អាស៊ីអាគ្នេយ៏ទាំងមូល) ផងដែរ។ ដោយឡែក ដីល្បាប់វិញ ប្រើប្រាស់ភាគច្រើនសម្រាប់ដាំដុះដំណាំរុក្ខជាតិ។

ដីឥដ្ឋមានភាពស្អិតរមួត ភាគល្អិតនៃដីនេះខាំគ្នាជាប់បានយ៉ាងល្អ ដែលជាហេតុធ្វើឱ្យដីឥដ្ឋពុំងាយបាក់ប្រេះនៅពេលសើម ឬស្ងួតខ្លាំង។ លក្ខណៈទាំងនេះធ្វើឱ្យដីឥដ្ឋងាយស្រួលផលិតក្នុងពុម្ពម៉ាស៊ីន សូនជាទម្រង់ផ្សេងៗ ជាវប្បធម៍ជុំវិញពិភពលោក ដែលប្រើកត្តានេះជាគុណប្រយោជន៌ទៅផលិតបានជាសម្ភារៈសំណង់ដូចជាដុំឥដ្ឋ ការ៉ូ សេរ៉ាមិច ប៉សឺឡែនជាដើម។