នៅជាន់ផ្ទាល់ដីនៃផ្ទះវីឡាពិសេសមួយខ្នងនេះ គឺជាការឆ្លុះបង្ហាញពីរចនាបថនៃជីវភាពរស់នៅដែលផ្សាភ្ជាប់មជ្ឈដ្ឋានរស់នៅទៅនឹងមជ្ឈដ្ឋានខាងក្រៅ។ ទីធ្លារស់នៅសំខាន់ៗនីមួយៗ ត្រូវបានខណ្ឌចែកពីទីធ្លាខាងក្រៅ ដោយទ្វា និងផ្ទាំងកញ្ចក់ ដែលលាតសន្ធឹងលើផ្ទៃជញ្ជាំងទាំងមូល។ ផ្ទៃកញ្ចក់ទាំងនេះមាននាទីជារនាំងការពារកម្ទេចកម្ទីធូលី ព្រមទាំងធ្វើឲ្យរុក្ខជាតិបៃតងដែលនៅខាងក្រៅ ក្លាយជាផ្នែកមួយនៃការតុបតែងខាងក្នុងសម្រាប់គេហដ្ឋានថែមទៀតផង។ ទាំងនេះនឹងផ្ដល់ជាទិដ្ឋភាពសួនច្បារបែបត្រូពិចមួយដែលលោកអ្នកអាចរីករាយទស្សនាបានជានិច្ចកាល មិនថាក្នុងពេលដែលលោកអ្នកកំពុងអង្គុយលំហែក្នុងបន្ទប់ទទួលភ្លៀវដ៏មានភាពកក់ក្ដៅ ឬចម្អិនអាហារ និងមានការជួបជុំក្នុងបន្ទប់ទទួលទានអាហារក៏ដោយ។ ដើម្បីផ្ដោតសំខាន់ទៅលើចំណុចប្លែកពិសេសមួយនេះ យើងបានធ្វើការជ្រើសរើសសម្ភារៈដែលមានពណ៌បែបធម្មជាតិ និងមានប្រើប្រាស់ក្បាច់តុបតែងបន្ដិចបន្ទួចដើម្បីជួយបង្កើតសោភ័ណភាពដល់គេហដ្ឋាន។